Opera Nordfjord gjennomførte sin 2. operagallaturne i dagane 25., 26. og 27. april med konsertar i Sogndal, Florø og Loen (Hotell Alexandra). Turneen vart ein stor kunstnarisk suksess, men diverre svikta publikum i Nordfjord den siste konserten, slik at det økonomiske resultatet vart eit underskot på ca 50.000-kroner. Årsakene til at heimepublikummet ikkje møtte opp, var fleire, m.a. at konserten kolliderte med andre kulturarrangement i området.
Underskotet til sides, for dei som møtte opp, vart konsertane ei flott musikalsk oppleving, med eit svært variert program. Vi fekk høyre både kjende solistariar, duettar og ensembler, i tillegg til flotte orkesterutdrag frå operalitteraturen. Orkesteret var samansett av 37 musikarar, dei fleste heimehøyrande i fylket og resten innleigde frå frilansmarknaden.
Solistane imponerte stort, og Opera Nordfjord var glade over å kunne presentere to nye solistar for vårt publikum: Trine Øien, mezzo-sopran og Jørgen Talle, tenor. Sopranen var ein kjend yndling for Opera Nordfjord, Cecilia Lindwall, som hadde hovudrolla Adina i ”Elskovsdrikken” i 2001.
Vi valde å ikkje ha med kor dette året, ikkje fordi vi ikkje ønskte det, men fordi det vart for kort tid til innøving. Opera Nordfjord ønskjer å komme i ein økonomisk situasjon, der vi har fridom til å planleggje 1-1,5 år fram i tid. Slik det er no, må vi vente med å ta ei avgjerd til etter at rekneskapen til hovudproduksjonen i oktober ligg føre, dvs. kring nyttår. Då vert det for kort tid til planlegging, marknadsføring, hyring av solistar og innøving. Trass i slike tilhøve, har vi greidd å gjennomføre to svært vellukka turnear, men vi ønskjer i framtida å planleggje desse turneane på lengre sikt.
Ein slik turne gjev Opera Nordfjord eit fint høve til å reise rundt i fylket og presentere operakunsten og gjere han meir tilgjengeleg for alle. Oppsøkjande verksemd i operaens teneste! Turneane er og god marknadsføring mot hovudproduksjonen i oktober; vi opplever at stadig nye publikummarar finn vegen til Nordfjordeid i operavekene.
Opera Nordfjord vonar at operagallaturneane i vårhalvåret er komne for å bli, og at dei skal fortsetje å vere eit attraktivt og spennande supplement til operaproduksjonane i mange år framover.
Nordfjordeid, 28.11.03
Kari Standal Pavelich
operasjef
